Dag 6 - Thogoto Teacher Training College

I dag fekk vi sove heilt til klokka halv 7! Frukosten stod på bordet klokka 7 og avreise frå SMCC var klokka 07.45. I dag skulle vi besøke Thogoto Teacher Training College, som er ein lærarhøgskule i Thogoto. Det tok ca ein halv time å køyre til dit.

Då vi kom til høgskulen vart vi møtt velkomne av rektor og andre lærarar ved skulen. Etter at dei hadde fortalt litt om skulen og vi hadde introdusert oss sjølve, vart det omvising på skuleområdet. Det var eit veldig stort og fint område som låg ganske skjerma frå trafikk og andre forstyrringar. Staden var i grunn nokså idyllisk. Dei hadde eigne dyr og eit stort område for idrettsaktivitetar. Skulen er ein internatskule, og dei er opptekne av at studentane skal vere i aktivitet etter skulen. Det virka som om der var eit godt miljø, både mellom studentane og mellom studentane og lærarane. Skulen er vidare sponsa av styresmaktene, så da er den i grunn gratis, men studentane måtte sjølve betale for å bu på internatet. Til saman budde der 620 studentar og dei budde på avskilte gute- og jentebygg, der kvart rom hadde plass til 4 stk. Romma var vidare berre avskilt med eit forheng.

Etter omvisinga bar det ned på microstudioet deira, der Kjetil skulle i elden. Det gjekk ut på å undervise for ei lita forsamling i ca 10 minutt, der alt vart tatt opp på film. Poenget med dette er at ein skal analysere korleis ein underviser og deretter vidareutvikle seg. Der var også ein frå skulen som gjennomførte same opplegget, slik at vi kunne samanlikne dei ulike metodane som dei brukte. Kjetil var veldig flink og fekk mykje skryt av både dei kenyanske og norske lærarane. Tett før vi skulle avslutte, kom også Nils Magne Magerøy, ein annan lærar vi har i Volda, til TTTC. Han skal vere med oss i nærmare to veker.

Då alle tilbakemeldingar var gitte, var det tid for ei te-pause før vi tok del i ein undervisningstime (som varte i to timar!) i historie. Den handla sjølvsagt om då europearane kom til Afrika, og vi fekk sjå korleis dei såg på koloniseringa, noko som var nye erfaringar for oss. Overraskande nok såg dei mest på dei positive sidene ved kolonialiseringa, kanskje i motsetnad til den europeiske versjonen som kan vere knytt til dårleg samvit og kan dermed få ein meir negativ haldning til temaet. Så var det tid for lunsj.

Etter lunsjen samla vi oss saman med utvalde kenyanske studentar i ein stor hall. Dei var 30 stk og vi berre 5, så kvar av oss fekk 6 studentar vi skulle samtale om lærarutdanning med i ca 30 min. Det var veldig interessant og tida gjekk fort. Vi fekk lære mykje om det kenyanske utdanningssystemet og dei fekk lære mykje av oss òg. Det vart også ein del taking av bilete før vi igjen samla oss i den store hallen. Der vart det ein del takketalar og vi delte ut gåver som vi hadde med frå Noreg. Dette var ein fotball og eit sett fotballdrakter frå Volda Fotball, samt norsk melkesjokolade slik at dei også kunne få smake eit lite stykke Noreg. Vidare var det takketale etter takketale, noko som heldt på i om lag ein time. Grunnen til at kenyanarane fokuserer så mykje på å takke besøkande, er fordi dei ser på det å få besøk som ei velsigning, og så er det ekstra spesielt med kvitingar (mzungu) på besøk.

Resten av ettermiddagen og kvelden bada vi i bassenget som vi har her på SMCC, åt middag, pakka til turen til Chesta og loggskriving.

NB! Det kan verte ei stund til vi får skrive blogginnlegg igjen, då vi skal stadar der det er dårleg eller ingen internett.

Hakuna matata!

Helsing Kenya-gjengen!