Dag 18 - Gardsbesøk og Kenyatta University

I dag åt vi frukost klokka 07.00 og reiste frå SMCC klokka 08.00. Vi køyrde opp til Limuru og møtte fem kenyanske studentar ved Limuru District Commisioner of Livestock, der vi vart introduserte for kvarandre og vidare informert om kva vi skulle gjere i dag. Sidan vi køyrde to bilar, blanda vi oss slik at i kvar bil satt både kenyanske og norske studentar då vi skulle verte betre kjende med kvarandre.

Vi køyrde til Kemubu Farm der vi vart godt tatt i mot av bonden James Kemubu. Dette var ein liten gard, men dei produserte og dyrka utruleg mykje og utnytta den jorda dei hadde veldig godt. Der var det ingenting som gjekk til spille! Vi vart vist rundt på garden av James og kona der dei forklarte og vi fekk sjansen til å stille spørsmål. Det første dei viste oss var dei tre kyrne som dei brukte til mjølkeproduksjon. Det som slo oss ved desse var at det såg ut til at dei hadde det veldig godt med masse god mat, rein innhegning og til og med madrassar til å sove på! Dei brukte også avføringa til kyrne til å lage biogass. Dette var noko av det som imponerte oss mest med denne garden. Biogassen brukte dei til gassbrennarane som dei laga mat på, samt belysning. Ein skulle tru at denne prosessen lukta, men der var faktisk inga lukt i det heile! Denne måten gjenbruk er utruleg miljøvennleg då dei ikkje treng å hogge ned tre for å få ved til matlaginga. Dei sparte også ein del pengar i straum på dette, og sidan det ikkje luktar vondt heller, kan ein seie at det også er nabovennleg. Dette var altså ein vinn, vinn, vinn situasjon!

Kyra ligg å chillan på madrassa 

 Ein del av biogassprosessen

Vidare hadde dei også to kalvar på garden, sauder, høner og kaninar. James og kona verka veldig entusiastiske for det dei dreiv med og var villige til å prøve nye ting og skaffe seg kunnskap. Dei hadde til dømes også drivhus på garden der dei dyrka tomatar, og inn i mellom desse tomatplantene planta dei løkplantar som skulle hjelpe tomatplantane mot infeksjonar frå insekt m.m. Dei dyrka også mais samt gras til kyrne sine. Vidare laga dei kompost som dei brukte i dyrkinga. Alt dette som dei dyrka og produserte brukte dei sjølv, men det som er til overs selde dei. På denne måten er denne garden ei blanding mellom sjølvbergingsjordbruk og marknadsstyrt jordbruk. Pengane dei tente brukte dei vidare til å betale for ungane sin skulegang. Det kom godt med då dei hadde seks born. 

Etter besøket ved denne garden, køyrde vi vidare til eit mjølkesamvirke som tilhøyrde dette distriktet. Her kjøpte dei mjølk frå medlemmane sine (lokale bønder) som dei pakka, marknadsførte og selde vidare. Kooperasjonen har no 9 000 medlemmar med 4 000 leverandørar. 80 % av det dei tente gjekk tilbake til bøndene, og leiaren for dette samvirket vart vald av dei aktive medlemmene som har ei stemme kvar. Vidare i dette lokalet produserte dei også kraftfor som bøndene kunne kjøpe på kreditt, og dei hadde også ein veterinær som medlemmane kunne bruke til ein lågare pris enn vanleg.

Då vi var ferdig med omvisinga køyrde vi til Kenyatta University, der dei fem kenyanske studentane studerer miljøplanlegging. Universitetet her var enormt stor med mange bygg for alle moglege slags utdanningar! Det første vi gjorde då vi kom var å setje oss ned på eit klasserom der vi fekk utdelt fire refleksjonsoppgåver om det vi hadde sett og erfart i dag. Vi gjekk saman med kvar vår kenyanske student og snakka om dette. Då vi var ferdig med oppgåvene, gjekk vi ned til eit anna bygg der musikkstudentar opptredde for oss. Vi fekk sjå mange ulike tradisjonelle musikkinstrument frå ulike delar av Kenya medan dei spelte, song og dansa for oss. Dette var verkeleg stilig!

Vi overnatta i gjestehuset til universitetet, noko som minna meir om eit hotell enn gjestehus. Vi fekk utdelt kvart vårt enkeltrom med eige bad, og måltida åt vi i restauranten som høyrde til bygget.

I dag måtte vi dessverre ta avskjed med Nils Magne. Turen er over for hans del no, men vi møter han igjen i førelesingane heime i Volda. Det var kjekt å ha deg med, Nils! Takk for vitsar og godt humør!

Alt i alt ein veldig interessant dag!
Helsing Kenya-gjengen!