Dag 16 - Fridag

I dag var første fridagen på turen og vi fekk sove litt frampå då frukosten vart servert klokka 9. Etter det hadde vi fri fram til klokka 11, då Rufus igjen stod klar til å køyre oss. I dag var det opp til oss sjølve kva vi ville bruke dagen til, og alle bestemte seg for å reise til eit giraffsenter i nærleiken. Der fekk vi mate giraffane, og nokre av oss var også så heldige at dei fekk eit kyss.

Etter ei lita stund gjekk vi inn i eit bygg der vi fekk informasjon om senteret og dei tre ulike sortane giraffar som finst. I denne parken hadde dei Rothschild-giraffar. Formålet til parken var å redde denne rasen, då den er svært truga. Vi fekk sjå og ta på skjelett av ein kjeve og eit tibia (leggbein) samt ein prototype av ei tunge som kan verte opp til 45 cm lang. Vidare såg vi også litt på skjelpaddene som dei hadde. Før vi reiste tilbake til SMCC, kika vi og handla litt i suvenirbutikken på senteret.

Tilbake på SMCC åt vi lunsj rundt klokka 13.30. Etter det var alle studentane einige om at vi ville slappe av på området resten av dagen, medan Odd Ragnar og Nils Magne tok seg ein tur på eit museum. Fram til klokka 16.45 satt vi alle saman nede ved bassenget og kosa oss. Då gjekk Kjetil og Maria for å spele fotball, medan dei andre låg att ei lita stund til før dei vidare arbeida med bloggen. Klokka 19.00 møttest alle til middag, og då var også Odd Ragnar og Nils Magne tilbake på SMCC. Til dessert skar Odd Ragnar opp eit sukkerrøyr som han hadde kjøpt på gata i dag. Det var som å ete rabarbra med sukkersmak. Her i Kenya er ungane veldig glade i å knaske på det, men vi var ikkje heilt overbeviste om at dette var det nye laurdagsgodteriet for oss.

Resten av kvelden gjekk til skriving av dagbøker og publisering av blogginnlegg, sidan vi endeleg hadde Internett igjen.

Helsing Kenya-gjengen!