Dag 2 - Sightseeing i Nairobi

I dag var det opp til oss sjølve kva tid vi ville stå opp, så lenge vi hadde fått i oss noko mat og var klare til å reise til Nairobi klokka 14.00. Mari, Maria og Ingvild var dei første som stod opp og fekk derfor ein guida tur frå Odd Ragnar rundt om på tomta til SMCC. Denne tomta er på heile 80 mål og inneheld alt frå basseng, badstue, leikeplassar, fotballbane, volleyballbane og trampoline til kontorbygg, konferansebygg, gjestehus, verkstad m.m. Området er gjerda inne med elektrisk gjerde som dei slår på om natta. Her er også tre vakter og hundar som passa på. Så her er det altså nokså trygt!

Klokka 14.00 kom sjåføren vår og henta oss til sightseeing-turen i Nairobi. Der var vi innom Uhuru Park, mausoleet til Jomo Kenyatta (1. presidenten til det frie Kenya) og Jomo Kenyatta Conference Center. Vi køyrde også forbi Mathareslummen der folk budde tett i tett, skulder mot skulder. Inne i Jomo Kenyatta Conference Center vart vi guida heilt opp på toppen av den 105 meter høge bygninga. Her fekk vi sett heile byen så langt auget kunne sjå. Der fortalde guiden vår omtrent alt som var å vite om Nairobi.

 

Her er Kenya-gjengen framfor Jomo Kenyatta Conference Center!

 

Det som slo om Nairobi var at det er ein by fylt av kontrastar, med alt frå høge skyskraparar til store slumområde. Uansett om vi var i sentrum av byen eller i slumområda, var folk generelt veldig fint kledde med anten fargerike kjolar eller skjorte og slips. Dette kan for så vidt også ha noko med at det var søndag og folk kler seg fint for å gå i kyrkje, uansett kva område av byen dei kjem ifrå. Det som vidare er ganske spesielt med Nairobi er at det ligg ein nasjonalpark vegg i vegg med byen, der det berre er eit gjerde som skil områda. Her kan ein finne alt frå løver, giraffar, sebraer og elefantar m.m. Vidare kan ein finne geiter og kyr inne i byen også, då gjeterane ledar dei dit dei finn beite.

Etter sightseeinga kom vi oss tilbake til SMCC der det var arrangert fotball blant dei norske som held til i eller rundt SMCC-området. Maria og Kjetil slo seg med og spelte ganske så bra til å vere 1800 meter over havet og rundt 30 varmegrader. Denne fotballsamlinga vert for så vidt arrangert kvar onsdag og søndag klokka 17.

Etter fotballen åt vi middag i spisesalen til SMCC og planla litt kva vi skulle gjere resten av kvelden. Den brukte vi til å pakke ut og samle saman alle gåvene vi hadde fått med oss heimefrå og sorterte dette. Her låg det utfordringar i å brette saman fotballdraktene fint og skikkelig og bestemme oss for kven av skulane som skulle få kva på besøka våre. Vidare samla vi oss og skreiv i dagbøkene våre, samt laga desse første innlegga til bloggen vår. Internettet er litt så som så her, men vi legg ut innlegga så snart som vi får det til.

Litt av utsikta frå Jomo Kenyatta Conference Center

Søppel ved Mathare-slummen

Tørking av klede

Mathare-slummen

Eit liiiite utval av gåvene som vi fekk med oss frå Noreg!

Helsing Kenya-gjengen!